شانۆنامە من جونەیدم، بەشی۳
(دەنگی تەپڵ و زووڕنا و مۆسیقای ڕەسەنی کوردی و خۆشی هاوسەرگیری،دەنگی گریانێکی نەبیستراو و تێنەگەیشتوو لەناو دەنگی تەپڵ و زووڕنا – لەناکاو هاوار و بێدەنگی. مورمورێکی کەسانی کنجکاو)
قەیرێك دوای ئاهەنگ،
دەنگی قیژەو فیزاح گشت خەڵكی دێكەی راچڵەكاند.
هەموو هاتنە دەرەوە و بۆ لای دەنگی قیژ و هوڕ رایانكرد.
هاوار و گیریان لەبەردەم ماڵی سامی بی.
بووكەخان ئەگیریا و هاواری ئەكرد،
سامیش لەسەر دۆشەكی زاوا:ییدا غەرقی خوێنی خۆی بی.
حاجی غەنی سەیری جەنازەی كوڕەكەی ئەكرد و ئەگیریا.
دایكی سامی دەستی ناوێیە قژی سەمیرە و ئەیوت:
قەحبە پێم بێژە ئەمە چییە؟ كێ وای لەكوڕەكەم كردە؟
سەمیرە بەگیریانەوە وتی نازانم نازانم من بێ هۆش بیم، كاتێ هۆشم هاتەوە ئەوە ئەدینم كە ئێوە ئەیدینن.
حاجی غەنی باش ئەیزانی چییە، هیچی نەئەوت خەڵكی دێ خڕبینەوە،
كەس و كاری سامی پەلاماری سەمیرەیاندا،
حاجی غەنی چەند هاواری كرد مەكەن بۆخاتری خوا مەكەن دەستی لێ مەدەن سەمیرە بێ گوناحە...
ئەو قسانە فایدەی نەوی،
دایكی سامی و خزمەكانی سەمیرەیان كوشت.
بەرەبەیان جەنازەی سەمیرە و سامی بۆ قەورسانی دێ بریان و هەردووكیان لەتەك یەكەوە نریانە چاڵ و هەموو شتێك تەواو بی.
زاوا: نەنكە مەنیج سامی كێ كوشتی؟ ئەی سەمیرەیان بۆ كوشت؟
نەنكە مەنیج : كوڕە زای عەزیزم سڕی ئەو حیكایەتە لای حاجی غەنییە.
سامی كاتێ عومری دەساڵان بییە،
رۆژێك ئەچێتە بان دارێكی بەرز،
باوكی هاوار ئەكا داوەزە سامی داوەزە ئەكەفیتەخوارەوە.
لەو وەختەیا عزرایل لەپشت حاجی غەنییەوە وێستاوە و بەغەنی ئەڵێ
عزرایل:
ئەی عەبدی عەزیز و شیرینی خوا،
مەترسە جارێ وەختی مردنی نەهاتگە.
غەنی رائەچڵەكێ عزرایل ئەڵێ مەترسە منم،
سامی جارێ نامرێ،
سامی لەخۆشترین رۆژەكانی عومریا لە جۆش قوەتیا ئەمرێ و كەسیش نایكوژێ خوا ئەمری مردنی ئەدا.
حاجی غەنی: پێم بێژە بۆ ئەوێ بمرێ.. ئەو تاقە كوڕەم هەیە.
عزرایل: ئەوێ بمرێ، ئەمری خوای گەورەیە. شەوێك ئەكوژرێ! بكوژەكەی دۆستی عەزیزی خۆیەتی، لەخۆشترین شەوی عومریا گورگێك ئەچێتە روحێوە. قەپ بەقوڕگی سامیا ئەكاو ئەیكوژێ.
زاوا: یەعنی چۆن؟ چۆن چۆنی؟
نەنكە مەنیج: بەقەدەری خواگیان سامی ئەژێ تاشەوی زاوا:یی. لەو شەوەیا بووكەخان ئەوێت وە گورگ و سامی باوشی پیا ئەكاو سەمیرەش ئەوێتە گورگی زاوا: خۆرەو ئەی خنكێنێ. تەواو تەواو بخەوە درەنگە.
زاوا: كاتێ نەنكم ئەو حیكایەتەی بۆ دەگێڕامەوە، دەگریا. ئێستا دەزانم بۆ دەگریا. نەنكم باش دەیزانی چارەنووسی من وەك چارەنووسی سامییە. هەر واش بوو. ژیانی من تێكەڵ بە ئەفسانەبوو.
کۆڕ٤: دۆسێی كوشتنی جونەید چووە دادگا و نارین و چووە زیندانەوە سەفوەت بەگیش تا رۆژی دادگایی كردن بەكەفالەت ئازادكرا .
کۆڕ۱:سێ رۆژ بەرلە دەستپێكردنی دادگایی، كەڵەشێرەكەی حەسەن قەرە ون دەبێت،
کۆڕ۲: كەس نازانێ چی لێدێت و كێ دەیبات.
کۆڕ۳:ئەفسەری لێكۆڵینەوە دوای ڕەوانەكردنی دۆسێی كوشتنی جونەید،
کۆڕ٤:توشی نەخۆشی دەروونی دەبێت و لە بیمارستان دەیخەوێنن.
کۆڕ۱:ژنەكەی شەو تابەیانی بەدیارییەوە دەگریا
کۆڕ۲: جەنابی ئەفسەریش بەدەنگی بەرز دەڵێ
ئەفسەری لێكۆڵینەوە:دادوەری بەرێز ئەسڵی روداوەكە لای كەڵەشێرەكەی حەسەن قەرەیە. كەڵەشێرەكەی حەسەن بدۆزنەوە، ئیتر هەموو شتێك ئاشكرا دەبێت...
کۆڕ۳:لەژوورەكەی تەنیشت جەنابی ئەفسەر،
کۆڕ٤:حەسەن قەرە بەقەروێڵەكەوە بەستراوەتەوە و هاوار دەكات
حەسەن قەرە:سەفوەت بەگ... سەفوەت بەگی سەگباب كەڵەشێرەكەمی كوشتووە... كەڵەشێرەكەم كەڵەشێرەكەم. ئەیكوژم سەفوەت بەگ. سەفوەت سەگ هەر ئەیكوژم...
کۆڕ: (هەموویان پێکەوە) دۆسێی كوشتنی جونەید رەوانەی دادگا كرا
کۆڕ۱:دادگایی روداوی كوشتنی زاوا:، پێكەنیناویترین دادگایی بوو.
کۆڕ۲:دادوەر كاتێ سەیری ئیفادەی كەڵەشێرەكەی حەسەن قەرەی دەكرد، قاقا پێدەكەنی.
کۆڕ۳:سەفوەت بەگ خەریك بوو دڵی دەتەقی و دادوەریش پێدەكەنی.
کۆڕ۱:سەفوەت دەیویست قسە بكات، رێگایان نەدەدا.
زاوا::باوكیشم بێ ئۆقرە دانیشتبوو، چاوەڕێی بڕیاری دادگای دەكرد.
کۆڕ٤:نارینیش دەگریا.
کۆڕ۱:دادوەر هێشتا بە ئیفادەی كەڵەشێرەكەی حەسەن قەرە پێدەكەنی و جارجارە دەیگوت ئافەرین ئەفسەری لێكۆڵینەوە...
کۆڕ۲:وردە وردە دادگایی كردن دەستی پێكرد و گفتوگۆكان چڕوپڕبوون.
کۆڕ۳:نارین لەبەردەم دادوەردا گوتی:
نارین:قوربان گیان من ئاگام لەكوژرانی مێردەكەم نییە،
ئەو ویستی بێتە لامەوەو بمكات بە ژن،
لەوكاتەدا بێ هۆش بووم،
كاتێك بێداربوومەوە،
جونەیدم لەسەر سیسەمەكە بینی كەوتبوو.
خوێنی لەبەر دەڕۆیشت.
ئیتر نازانم چۆن بوو، كێ كوشتویەتی، منیش خەریكە شێت دەبم... نازانم... نازانم...
دادوەر:( رووی لەسەفوەت دەکات): ئەوكاتەی جونەید كوژراوە، بەپێی ئیفادەكەت تۆ لەماڵی خۆت بوویت و میوانت هەبووە؟
کۆڕ: (هەموویان پێکەوە) دادگا پەتی تاوانی خستە ملی نارینەوە
کۆڕ۱:دادوەر سەفوەت بەگی ئازادكرد
زاوا: و نارینی بەتاوانی كوشتنی من، سزادا و بەرەو زیندان بەڕێ كرا. هەرخۆشم دەزانم كێ كوشتوومی! نارینی مەعشوقی شەش ساڵەی من چۆن كاری وا دەكات. خۆزگا توانیبام.. خۆزگا توانیبام لەم گۆڕەتاریكە هەستمەوە. بچوومایەتە لای دادوەر تا ئیسپاتی بێ تاوانی نارینم بكردایە.
کۆڕ: (هەموویان پێکەوە)مردن چۆن هات؟
زاوا: زۆر خۆشحاڵ و ئاسوودەبووم كاتێ بەنارین گەیشتم. ئەوە خۆشترین ساتەكانی ژیانم بوو. زۆرم بەرگەگرت، بەرگەی قسە ناخۆشەكانی سەفوەت بەگ و قسە تاڵەكانی باوكمم گرت.
سەفوەت بەگ: تۆی دەست و پێ سپی...
تۆی كوڕە سواڵكەر چۆن دەتوانی كچی من بەخێوبكەیت!
تۆ ناتوانی خۆت بژێنی، ئیتر چۆن دەتوانی ماڵ و منداڵ بەخێو بكەیت.
ئەزانی من بێزم نایەت تۆ بكەم بەزاوای خۆم، بەڵام چیبكەم كچە بەدبەختەكەم تۆی لێ بووە بەسیامەند، فەرهاد، مەجنوون... چی بكەم.
باوك:جونەید هەرچییەكت دەوێت بەچاوان پەنجە بخەسەر كچێك، هەركچێك بەس كچی ئەو خوێڕییە نا. ئاخر سووكی رسوا كەس نەما ئەو نامەردەنەبێت...
زاوا:ئەم قسانە زۆری ئازاردەدام بەڵام بەیەك زەردەخەنەی نارین هەموویم بیردەچووەوە. كاتێك چووینە ماڵی خۆمان و دەرگامان داخست. خۆشبەختبووین بەوەی كە ژیانی كامەرانیمان دەستی پێكرد. من هێشتا تامی نارینم نەكردبوو. نارین هێشتا جلی بووكێنی دانەكەندبوو. مردن هات.
کۆڕ: (هەموویان پێکەوە) مردن هات... مردن لەكەوڵی گورگێكی برسی هات و چووە رۆحی نارینەوە.
زاوا:نارین هاتە لامەوە و گوتی
نارین:جونەیدی من بۆ بێدەنگی؟ قسەیەك بكە ئازیزەكەم.
زاوا::من بەبێ دەنگی ئاوڕم دایەوە و باوەشم پێدا كرد،
باوەشم بە مەرگی خۆمدا كرد،
گورگێك قەپاڵی بەگەروومدا كرد تا نەیخنكاندم وازی نەهێنا، مردم، مردم و ئەوەتام لەم گۆڕە‌تاریك و نوتەكەدا، كرم و مار و مێرۆ تێم ئاڵاون، خەریكن دەمخۆن. نارینیش ئەوەتا لەزینداندا.
_____________________________________________
مەحمود نەجمەدین