بەیاننامەی لێژنەی بەڕێوەبەری یەکەمین فێستیڤاڵی شانۆنامەنووسیی کوردی

هەرجۆره باسێک له سەر چەمکێک به ناوی شانۆی کوردی ئەگەر قایل به بوونی وەها چەمکێک بین، گرێ دراوه به پرسی زمانەوه و بێ گومان زمان له شانۆدا له پانتای شانۆنامەدا خۆ دەردەخا و کەوابوو باسی شانۆی کوردی به بێ هاتنه ئارای باسی شانۆنامەی کوردی هەندێ ئەستەم دەنوێنێ.

پتر له بیست ساڵه پرسی شانۆی کوردی لای ئێمه به شێوەیەکی جیدی هاتۆته ئارا و ئەمڕۆکه دەیان گرووپی شانۆیی هەن که له فێستیڤاڵەکان یاخۆ له نواندنه گشتییەکان‌دا شانۆ به زمانی کوردی پێشکەش دەکەن، بەڵام سەرەڕای ئەوەش تا ئێستا شانۆنامه چ لای شانۆکاران و چ لای نووسەران و ئەدیبان وەک شتێکی گرینگ چاوی لێ نەکراوه و ناتوانین باس له ڕەوتێکی شانۆننامه‌نووسیی لای خۆمان بکەین و زۆرینەی گرووپەکان یان پشتیان بەستووه به دەقه بیانی یان فارسییەکان و یان دەقی کارگایی که هەر له سەر تەمرین بەدی دێن، نەک به دەقێک که وەک بەرهەمێکی سەربەخۆی ئەدەبی که دواتر وەک شانۆ پێشکەش دەکرێ.

فستیواڵی شانۆنامەنووسیی کوردی له وەها دۆخێک‌دا و به پێی وەها پێداویستییەک بەدی هاتووه. فێستیڤاڵێک که دەبوو زۆر زووتر لەوانه دەستی پێ کردبایه تا شانۆی کوردی ببێته خاوەن شوناسی تایبەتی خۆی، بەڵام ئێستاش درەنگ نەبووه و دەبوو ئەم ڕەوته له شوێنێک و له جێیەکەوه سەر هەڵبدا و خۆشحاڵین که شاری بۆکان بووه مەکۆ و کانگای ئەم بزاڤه؛ شارێک که هەر له کۆنەوه به شاری چیرۆک ناسرابوو و ڕەنگه له شێوەکانی گێڕانەوەدا چیرۆک نزیکترین شێوه به شانۆنامه بێت.

بۆ بەڕێوەچوونی ئەم فێستیڤاڵه تەنگ و چەڵەمه ئێجگار زۆر بوو له ئاستەنگی ئابووری و ماڵییەوه بگرە تا دەیان بەردی که دەهات یان دەیانخسته سەر رێمان، بەڵام چون ئەم پێداویستییه گرینگەمان هەست پێ کردبوو کۆڵمان نەدا و فێستیڤاڵ تا ئێره گەیشت. هەرچەن وەک یەکەمین خول به دڵنیاییەوه کەم و کوڕی زۆره که ئێمه سینگمان ئاوەڵایه بۆ بیستنی ڕاوبۆچوون و ڕەخنەی دۆستان بەڵام هەر ئەوەی تا ئێره هاتووه به له خۆبردوویی و حەولێکی زۆری ئەم لێژنەیه و هەڤاڵانی ئێمه بووه. ئێمه پێمان وایه ئەم فێستیڤاڵه کاتێک کاریگەریی خۆی نیشان دەدا که چەندین خول دوابەدوای یەک بەڕێوه بچێ. هەربۆیه له ئێستاوه قۆڵ هەڵدەماڵین بۆ دووهەمین فێستیڤاڵی شانۆنامەنووسیی کوردی و داوا له هەموو کاربەدەستان و نووسەران و هونەرمەندان و هۆگرانی هونەری کوردی دەکەین وەک هەمێشه لەم رێگه دژوارەدا پشتیوانمان بن.

لێژنەی بەڕێوەبەری یەکەمین فێستیڤاڵی شانۆنامەنووسیی کوردی

١١ی گەلاوێژی 1397 بۆکان